Mar 15 | Ndebele | STEP | Kwathi khonokho ekuseni kakhulu abapristi abakhulu benza umhlangano kanye labadala lababhali , lomphakathi wonke , bambopha uJesu ba m qhuba ba m nikela kuPilatu .

Mark 15

UJesu uphambi kukaPilatu

1 Kwathi khonokho ekuseni kakhulu abapristi abakhulu benza umhlangano kanye labadala lababhali ^a, lomphakathi wonke ^b, bambopha uJesu bamqhuba bamnikela kuPilatu ^c. 2 UPilatu wasembuza wathi: Wena uyiNkosi yamaJuda yini? Wasemphendula wathi kuye: Uyatsho wena. 3 Abapristi abakhulu basebemmangalela ngezinto ezinengi; kodwa yena kaphendulanga lutho. 4 UPilatu wasebuya embuza, wathi: Kawuphenduli lutho yini? Khangela, zingaki izinto abazifakazayo ezimelana lawe. 5 Kodwa uJesu kabesaphendula lutho, waze wamangala uPilatu ^d.

6 Langomkhosi wayebakhululela isibotshwa esisodwa, loba yisiphi abasicelayo. 7 Kwakukhona umuntu othiwa nguBarabasi, owayebotshiwe lalabo ababevukele umbuso laye, ababebulele ekuvukeleni umbuso. 8 Ixuku laselimemeza laqala ukucela ukuthi enze njengalokho ayehlezi ekwenza kubo. 9 UPilatu wasebaphendula, wathi: Lithanda ukuthi ngilikhululele iNkosi yamaJuda yini ^e? 10 Ngoba wayekwazi ukuthi ngomona abapristi abakhulu bamnikele. 11 Kodwa abapristi abakhulu bavusa ixuku, ukuthi kungcono alikhululele uBarabasi ^f. 12 UPilatu wasephendula wathi futhi kubo: Pho lifuna ngimenzeni lo elithi uyiNkosi yamaJuda? 13 Basebememeza futhi bathi: Mbethele! 14 Kodwa uPilatu wathi kubo: Ngoba wenze ububi bani? Kodwa bamemeza kakhulu bathi: Mbethele!

15 Khona uPilatu ethanda ukukholisa ixuku, wabakhululela uBarabasi; kodwa wamnikela uJesu, esemtshaye ngesiswepu, ukuthi abethelwe ^g.

Abebutho bamenza uJesu inhlekisa

16 Abebutho basebemngenisa ^h phakathi, egumeni ⁱ, eliyindlu yombusi, basebebizela ibutho lonke ndawonye ^j, 17 bamgqokisa okuyibubende, sebeluke umqhele wameva bamethesa, 18 baqala ukumbingelela besithi: Bayethe, Nkosi yamaJuda! 19 Batshaya ikhanda lakhe ngomhlanga, bamkhafulela amathe, baguqa ngamadolo bamkhonza ^k. 20 Sebemklolodele, bamhlubula okuyibubende, bamgqokisa ezakhe izembatho. Basebemusa phandle ukuze bambethele.

UJesu esiphambanweni

21 Babamba ngamandla omunye owayesedlula othiwa nguSimoni umKurene, evela emaphandleni, uyise kaAleksandro ^l loRufusi ^m, ukuthi athwale isiphambano sakhe.

22 Basebemusa endaweni ⁿethiwa yiGolgotha, okuyikuthi ngokuphendulelwa, iNdawo yokhakhayi ^o. 23 Basebemnika iwayini lixutshaniswe lenhlaka ukuthi alinathe ^p; kodwa kalemukelanga. 24 Sebembethele, babelana izembatho zakhe, benza inkatho yokuphosa ngazo, ukuthi ngamunye uzathathani. 25 Kwakulihola lesithathu*, njalo bambethela ^q. 26 Futhi kwakulombhalo wecala lakhe elalibhalwe phezulu usithi: INKOSI YAMAJUDA ^r.

27 Njalo babethela kanye laye abaphangi ababili, omunye ngakwesokunene lomunye ngakwesokhohlo sakhe. 28 Wasugcwaliseka umbhalo othi: Futhi wabalwa kanye lezoni ^s.

29 Labedlulayo bamhlambaza, benikina amakhanda abo, besithi: Hiya, wena odiliza ithempeli, ulakhe ngensuku ezintathu, 30 zisindise, wehle esiphambanweni. 31 Langokunjalo abapristi abakhulu labo bakloloda kanye lababhali bathi omunye komunye: Wasindisa abanye, angezisindise yena. 32 UKristu iNkosi yakoIsrayeli kehle khathesi esiphambanweni, ukuze sibone sikholwe. Lababebethelwe kanye laye bamklolodela.

Ukufa kukaJesu

33 Kwathi sekufike ihola lesithupha*, kwaba khona ubumnyama phezu komhlaba wonke kwaze kwaba lihola lesificamunwemunye*. 34 Ngehola lesificamunwemunye uJesu wamemeza ngelizwi elikhulu, wathi, "Eloyi, Eloyi, lama sabaktani?" Okuyikuthi ngokuphendulelwa: Nkulunkulu wami, Nkulunkulu wami, ungitshiyeleni ^t? 35 Labanye kwababemi khona besizwa bathi: Khangelani, ubiza uElija. 36 Wasegijima omunye, wagcwalisa uzipho ngeviniga, waluhloma emhlangeni, wamnika ukuthi anathe, esithi: Yekelani, sibone uba uElija uzakuza amethule. 37 UJesu wasememeza ngelizwi elikhulu waphefumula okokucina ^u.

38 Leveyili lethempeli ladatshulwa laba zincezu ezimbili laqala phezulu lisiya phansi. 39 Kwathi induna yekhulu eyayimi maqondana laye ibona ukuthi ukhale njalo, waphefumula okokucina, yathi: Ngeqiniso lumuntu ubeyiNdodana kaNkulunkulu ^v.

40 Kwakukhona labesifazana bebukele bekhatshana, okwakukhona phakathi kwabo loMariya Magadalena, loMariya unina kaJakobe omncinyane lokaJose, loSalome, 41 (labo abamlandela, eseseGalili, bamsebenzela), labanye abesifazana abanengi abenyukela eJerusalema ^w laye.

Ukungcwatshwa kukaJesu

42 Kwathi sekuhlwile ^x, ngoba kwakungamalungiselelo, okuyikuthi usuku phambi kwesabatha ^y, 43 wafika uJosefa owayevela eArimathiya, ilunga ^z elihloniphekayo ^aa lomphakathi, owayelindele laye umbuso kaNkulunkulu ^ab; wangena ngesibindi kuPilatu, wacela isidumbu sikaJesu. 44 UPilatu wasemangala ngokuthi usefile; wabizela kuye induna yekhulu, wayibuza ukuthi kambe sekuyisikhathi efile. 45 Esazisiwe yinduna yekhulu, wamnika uJosefa isidumbu ^ac. 46 Wasethenga ilembu elicolekileyo, wamethula, wamgoqela ngelembu elicolekileyo, wambeka engcwabeni elaligujwe edwaleni; wagiqela ilitshe emnyango wengcwaba. 47 Futhi uMariya Magadalena loMariya unina kaJose babona lapho abekwe khona ^ad.